ಮಡಿಕೇರಿ ತಾಲೂಕಿನ ಕೆಲವು ಭಾಗಗಳಲ್ಲಿ ಬುಧವಾರ ಬೆಳಗ್ಗೆ ಭೂಮಿ ಕಂಪಿಸಿದ ಅನುಭವ……
ಮಡಿಕೇರಿ ತಾಲೂಕಿನ ಕೆಲವು ಭಾಗಗಳಲ್ಲಿ ಬುಧವಾರ ಬೆಳಗ್ಗೆ ಭೂಮಿ ಕಂಪಿಸಿದ ಅನುಭವವಾಗಿದೆ. ಮದೆನಾಡು, ಎರಡನೇ ಮೊಣ್ಣಂಗೇರಿ, ಬೆಟ್ಟತ್ತೂರು, ರಾಮಕೊಲ್ಲಿ, ದೇವಸ್ತೂರು, ನಗರದ ಫೀಲ್ಡ್ ಮಾರ್ಷಲ್ ಕಾರ್ಯಪ್ಪ ಕಾಲೇಜು ಹಿಂಭಾಗದ ಪ್ರದೇಶಗಳಲ್ಲಿ ಅಲ್ಪ ಪ್ರಮಾಣದಲ್ಲಿ ಭೂಮಿ ಕಂಪಿಸಿದೆ. ಬುಧವಾರ ಬೆಳಗಿನ ೧೦.೫೦ರ ಸಮಯದಲ್ಲಿ ಈ ಅನುಭವವಾಗಿದೆ ಎಂದು ಸಾರ್ವಜನಿಕರು ಆತಂಕ ವ್ಯಕ್ತಪಡಿಸಿದ್ದಾರೆ. ಮದೆನಾಡು ವ್ಯಾಪ್ತಿಯ ಗ್ರಾಮಗಳಲ್ಲಿ ಬುಧವಾರ ಬೆಳಗಿನ ೧೦ ಗಂಟೆ ೪೯ ನಿಮಿಷ ೫ ಸೆಕೆಂಡ್ ವೇಳೆಗೆ ರಿಕ್ಟರ್ ಮಾಪಕದಲ್ಲಿ ದಾಖಲಾಗಿರುವಂತೆ ‘೧.೬ ಮ್ಯಾಗ್ನಟ್ಯೂಡ್’ ಪ್ರಮಾಣದಲ್ಲಿ ಭೂಮಿ ಕಂಪಿಸಿದೆ ಎಂದು ಕರ್ನಾಟಕ ರಾಜ್ಯ ಪ್ರಾಕೃತಿಕ ವಿಕೋಪ ನಿರ್ವಹಣಾ ಘಟಕ ಅಧಿಕೃತವಾಗಿ ಭೂಮಿ ಕಂಪಿಸಿರುವುದನ್ನು ದೃಢಪಡಿಸಿದೆ. ಮದೆ ಗ್ರಾಮದ ವಾಯುವ್ಯ ದಿಕ್ಕಿನ ೨.೪ ಕಿ.ಮೀ ದೂರದಲ್ಲಿ ಭೂಮಿಯ ೫ ಕಿ.ಮೀ ಆಳದಲ್ಲಿ ಈ ಕಂಪನದ ಕೇಂದ್ರ ಬಿಂದುವಿತ್ತು. ಪರಿಣಾಮ ಒಟ್ಟು ೧೫ರಿಂದ ೨೦ ಕಿ.ಮೀ ವ್ಯಾಪ್ತಿಯಲ್ಲಿ ಅಲ್ಪ ಪ್ರಮಾಣದಲ್ಲಿ ಭೂಮಿ ಕಂಪಿಸಿದ ಅನುಭವವಾಗುತ್ತದೆ ಎಂದು ಕರ್ನಾಟಕ ರಾಜ್ಯ ಪ್ರಾಕೃತಿಕ ವಿಕೋಪ ನಿರ್ವಹಣಾ ಘಟಕ ಸ್ಪಷ್ಟಪಡಿಸಿದೆ. ಇದು ಭೂಪದರಗಳ ಚಲಿಸುವಿಕೆಯ ಪರಿಣಾಮ ಉಂಟಾದ ಅಲ್ಪ ಪ್ರಮಾದ ಕಂಪನವಾಗಿದೆ. ಈ ಕಂಪನಗಳು ಯಾವುದೇ ರೀತಿಯ ಅನಾಹುತಗಳನ್ನು ಉಂಟು ಮಾಡುವುದಿಲ್ಲ. ಆದ್ದರಿಂದ ಕಂಪನದ ಅನುಭವ ಉಂಟಾದ ಪ್ರದೇಶದ ನಿವಾಸಿಗಳು ಆತಂಕಪಡುವ ಅಗತ್ಯವಿಲ್ಲ ಎಂದು ಕರ್ನಾಟಕ ರಾಜ್ಯ ಪ್ರಾಕೃತಿಕ ವಿಕೋಪ ನಿರ್ವಹಣಾ ಘಟಕ ಮಾಹಿತಿ ನೀಡಿದೆ.
Recent News
.jpg)
.jpg)